Dépopulation.

Quand Florent Lemaigue (o savez, ch’tiou berdouilleux avu des cavieux comme des badjettes ed tambour qui restoué din l’temps din ch’prémier baraqu’min del route ed Sarville) il o té mort pi interré, il o fallu placher ses files.

O comprindrez bien tertous qui n’étoué point possibe ek Charline al aïeux tout seule troués marmousets, pus deux grandes garces : Maria, tchinze ans, Victoria, deux z’ans d’moins. Et d’autant pus què l’prémière al avoué déjo un jonne ed six moués, ek l’eute al fréquintoué ch’l’ingréneu d’el batterie, et qu’Charline al étoué in kaleur douze moués par an.

Môsieu l’Maire a tout d’suite comprin l’situation et jugé qu’tous l’z’ans il alloué i avouère au moins deux couvées. Et pi, l’commune al avoué déjo pouéyé ch’méd’cin, ch’pharmacien, ch’boulinger, ch’boucher, ch’marchand d’carbon, pi ch’certcheuil.

Vrai, a n’povoué point durer.

« Pou k’mincher, qui dit, feut qu’jé m’débarrache ed Victoria.»

Et comme il étoué bien coneu tout partout i n’o point ieu grand mau à li trouver enn’ plache  à Anmiens chez un copain à leu qui t’noué un commerce ed keuchures.

D’abord tout o bien été. Et pi, un jour, il est arrivé ch’ qu’o n’éroué pu d’viner. L’donzelle al o profité qu’al étoué tout seule in momin din ch’magasin pour vidier ch’tirouère-tchaise. A n’no point porté verte feulle pace que ch’patron n’o point té long à sé n’n’aperchuvouère. Il o foutu Victoria al porte.

Et l’vlo donc rintrée mon s’mère.

« Quoué qué j’vo fouère ed cho ? » qui pinse ech maire. Et, comme i iavoué Consel ed lind’main, i n’n’o parlé à chés Conseyers.

Or, i iavoué déjo au moins tchinze jours ek Maria al étoué parteue à Pareuchez enn’ cousenne ed loin à défunt sin père qui t’noué un tchiou hôtel du côté d’la gare Saint Lazare.

Al avoué décidé à part elle ed fouère el pieu putou qu’d’aller à bett’raves. Naturel’min al avoué laissié si bâtard à s’mère.

Ch’Consel il o pinsé qu’Victoria étoué couère un molé jonne pour travailler din la tchulture et qu’à n’avoué qu’à r’joindre es sœur. Deux jours après ch’étoué foué. Jé n’vous dirai point ouèche qu’al o ieu des sous pour prenne ech train. Nan, jé n’vous l’dirai point : o n’vodrouète point crouère.

L’s’maine d’après Charline al o condueu ses quate pissieuses à l’Assistance et al o suiveu l’mouvemin.

Tchièche qu’o poussé un ouf ed soulag’min ? Ch’est ch’maire et cheux d’ech Bureau.

Deux ans sont passés. On n’o pu intindeu parler d’el l’etchipe.

Et pi, vlo ti point qu’un jour au souère ch’l’autobus i s’arrête et qu’toute l’etchipe débarque. Charline pour kmincher, Maria pi Victoria après, avu un sidi, l’eute avu un italien et l’trouésième avu un chinoué. Charline al traînoué deux jumeaux qui marchouètent à peine, Maria t’noué din ses bros un tchiou d’sept huit moués, et Victoria al étoué déjo tel’min ronde qui n’étoué point difficile d’edviner qu’à n’n’avoué pu pour longtemps.

Comme ech baraqu’min il étoué toujours lo tout l’monde s’est installé. Tchèques jours après i z’ont té r’prenne chés gamins à l’Assistance.

Ch’maire i s’arrachoué ses cavieux.

« Si j’avouai préveu cho, qui m’dit, j’éroué foué démolir el baraque ! »

Ech marister ed Rustoville.